इन्भेस्टमेन्ट मेगा बैङ्कका सिइओ पाण्डे पक्राउ

दूरसञ्चार सेवाप्रदायक स्मार्ट टेलिकमसँग सम्बन्धित ठगी तथा आपराधिक विश्वासघात मुद्दामा नेपाल प्रहरीको केन्द्रीय अनुसन्धान ब्युरो (सिआइबी) ले नेपाल इन्भेस्टमेन्ट मेगा बैङ्क लिमिटेडका प्रमुख कार्यकारी अधिकृत (सिइओ) ज्योतिप्रकाश पाण्डेलाई पक्राउ गरेको छ ।

नेपाल दूरसञ्चार प्राधिकरणबाट अनुमति प्राप्त गरी सेवा सञ्चालन गर्दै आएको सो प्रालिले नियम अनुसार अनुमति नवीकरण नगरेपछि कम्पनीको अनुमतिपत्र स्वतः खारेज भएको थियो । त्यसपछि दूरसञ्चार सेवाप्रदायकको सम्पत्ति, पूर्वाधार, संरचना तथा प्रणाली नेपाल सरकारको स्वामित्वमा आउने कानुनी व्यवस्था रहे पनि सो सम्पत्तिमाथि गैरकानुनी चलखेल भएको खुलेको छ । सिआइबीका प्रवक्ता शिवकुमार श्रेष्ठका अनुसार उक्त प्रकरणमा सरकारी सम्पत्तिमा हानि पु¥याउने तथा नेपाल सरकारको हक अधिकार कमजोर पार्ने उद्देश्यसहित कार्य भएको भन्दै मुलुकी अपराधसंहिता, २०७४ अन्तर्गत ठगी तथा आपराधिक विश्वासघात कसुरमा अनुसन्धान अघि बढाइएको छ ।

ललितपुर–५ निवासी ६३ वर्षीय पाण्डेलाई सिन्धुलीको कमलामाई नगरपालिका क्षेत्रमा सवारी जाँचका क्रममा पक्राउ गरिएको हो । पक्राउपछि पाण्डेलाई काठमाडौँ ल्याई थप अनुसन्धान भइरहेको सिआइबीले जनाएको छ ।

स्मार्ट सेल घोटाला प्रकरण

स्मार्ट टेलिकमले आधारभूत टेलिफोन सेवा सञ्चालनका लागि २०७० वैशाख २ गते अनुमतिपत्र प्राप्त गरेको थियो । कम्पनीले सेवा विस्तारका क्रममा विभिन्न उपकरण, टावर र नेटवर्क पूर्वाधार निर्माण गरेको थियो ।

कम्पनीले नेपाल इन्भेस्टमेन्ट मेगा बैङ्क लिमिटेडसहित विभिन्न बैङ्कबाट ऋण लिएको पाइएको छ । एनआइएमबीसँग २०७६ पुस २९ गते भएको सम्झौता अनुसार बैङ्कले कुल पाँच अर्ब २० करोड २२ लाख १० हजार रुपियाँ ऋण लिएको खुलेको छ ।

ऋण लिने क्रममा स्मार्ट टेलिकमले आफ्ना नेटवर्क उपकरण, मेसिनरी तथा अन्य पूर्वाधार धितो राखेको पाइएको र कम्पनी आर्थिक रूपमा कमजोर बन्दै गएपछि ऋण तिर्न नसक्दा अनुमतिपत्र नवीकरण नगरेको पाइएको छ ।

दूरसञ्चार ऐन, २०५३ अनुसार २०८० वैशाख २ पछि कम्पनीको लाइसेन्स स्वतः खारेज भएपछि नेपाल दूरसञ्चार प्राधिकरणको नाममा आएको उक्त कम्पनी नेपाल इन्भेस्टमेन्ट मेगा बैङ्कमार्फत लिलाम गरी निजी कम्पनीलाई बिक्रीवितरण गरेको पाइएको छ । स्मार्ट टेलिकमले राज्यलाई करिब सात अर्ब रुपियाँ राजस्व तिर्न बाँकी रहेको अवस्थामा लिलामी प्रक्रिया अघि बढाई एनसेल कम्पनीलाई चार अर्ब ६० करोड रुपियाँमा बिक्री गरेको पाइएको छ ।