कृषि तथा पशुपन्छी विकास तथा वन तथा वातावरण मन्त्री गीता चौधरीले आफ्नो सम्पत्ति विवरण सार्वजनिक गरेकी छन् ।
आइतबार सार्वजनिक गरिएको विवरणअनुसार उनले ५० हजार रुपैयाँ मूल्य पर्ने घडी लगाउने गरेको उल्लेख छ । त्यस्तै, ९० हजार रुपैयाँको मोबाइल र ७५ हजार रुपैयाँको ल्यापटप रहेको जनाइएको छ ।
उनको नाममा ५ तोला सुन र १०० तोला चाँदी रहेको उल्लेख छ । उक्त सुन तथा चाँदीको स्रोत पैतृक र स्वआर्जन भएको विवरणमा जनाइएको छ ।
बैंक खातातर्फ ५ वटा बैंकमा गरी कुल १ लाख २६ हजार रुपैयाँ मौज्दात रहेको विवरणमा उल्लेख गरिएको छ ।
मन्त्री चौधरीले ऋण लिएर एउटा स्कुटर खरिद गरेको पनि विवरणमा उल्लेख छ । १ लाख ५० हजार रुपैयाँ ऋणमध्ये ८४ हजार रुपैयाँ भुक्तानी गरिसकेको जनाइएको छ ।
त्यस्तै, स्वआर्जनबाट खरिद गरिएको ३ लाख ३० हजार रुपैयाँ मूल्यको अर्को स्कुटरसमेत रहेको उल्लेख गरिएको छ ।
सम्पत्तिमा माइतीले उपहार दिएको २ वटा बाख्रा र १० वटा कुखुरा पनि रहेको विवरणमा जनाइएको छ ।