चालु आर्थिक वर्ष २०८२/८३ को दोस्रो त्रैमासिकसम्म वाणिज्य बैंकहरूको खुद नाफा ११.५१ प्रतिशतले बढेर ३० अर्ब ५९ करोड रुपैयाँ पुगेको छ ।
गत वर्ष यही अवधिमा नाफा २७ अर्ब ४३ करोड रुपैयाँ थियो । आर्थिक सुस्तता, खराब कर्जा र कर्जा प्रवाहको संकुचनबीच पनि २० मध्ये ११ बैंकले नाफा बढाएका छन् । नाफामा नबिल बैंक अग्रस्थानमा रहँदै ४ अर्ब ७५ करोड रुपैयाँ कमाएको छ भने ग्लोबल आइएमई दोस्रो स्थानमा छ । कुमारी बैंकले खराब कर्जा नियन्त्रणसँगै ८८६ प्रतिशतले नाफा बढाउँदै तेस्रो स्थान हासिल गरेको छ ।
नेपाल बैंक र राष्ट्रिय वाणिज्य बैंकले पनि उल्लेख्य सुधार देखाएका छन् । यता, ८ बैंकको नाफा घटेको छ भने लक्ष्मी सनराइज बैंक २७ करोड रुपैयाँ नोक्सानमा गएको छ । उच्च प्रोभिजनिङ, कर्जा मागको कमी र स्प्रेड दर घट्दा केही बैंकको नाफामा दबाब देखिएको छ ।
